L'silicosé

Sur ch'querpion i s'in va ployé in deux
i sufoque comme eune vielle locomotife
à s'n'ache i a bin du ma à devenir viux
mais l' silicosse ne l' laiche pus vife


I voudrot bin core aller au carbon
mais i a bétôt pus d' poumon
alors i traine s'vielle carcasse
duchemint in raclant ses godasses

I s'forche au moins eune fos par jour
à s'promener dins sin vieux coron
à essayer incore d'un faire l'tour
vire des gins pis rintrer a s'mason

Ch'vint i souffèle dins ches rues
chés gins arserr'tent leux pardessus
l'air i est d'pus in pus frais
in sint qu' l' hiver i va arriver

Dins chés gulots les feulles mortes
vol'tent in tournant d'vant ches portes
ch'ciel i est querqué d'nuaches gris
ch'biau temps d'l'été i est bin fini

Bétôt ch'arsera Noël,neiche et verglas
ch'temps i passe d'pus in pus vite
surtout d'puis qu'alle est pus là
i l'avos si quer s'fosse du huit

Eune fos qu'l'automne sera passée
i n'a core au moins pour eune année
pour ches feulles, pour ches silicosés
ch'est l'saison pour duchemint s'in aller

                                                              retour liste             suivant