LE PETIT PRINCE
                                                  CHAPITRE 17

            Quand in veut faire d’l’esprit, i arrife qu’in minte un peu. J’ai pas été très honnète in vous parlant d’ches allumeux d’révérbère. J’risque d’ donner eune fausse idée d’ not’planète à cheux qui l’ connotent pas. Ches hommes occup’tent très peu d’plache sur l’Tierre. Si ches deux millards d’habitants qui peupl’tent l’Tierre is s’tenotent debout et un peu serrés, comme pour un meeting, is logerotent aisémint sur eune plache publique d’ vingt milles d’long sur vint milles d’larche. In pourrot intasser l’humanité sur l’moinde tchiot îlot de ch’pacifique.
            Ches grindes personnes, bin sûr, vous croront pas. Alles s’imagin’tent tenir gramint d’plache. Alles se votent importantes comme des baobapes. Vous leur consellerez donc d’faire ch’calcul. Alles ador’tent les chiffes : Cha leur plaira. Mais perdez pas vot’timps à ch’pinsum. Ch’est inutile. Vous avez confiance in mi.

                                                                                                                                        

            Ch’tchiot prince, eune fos sur Tierre, fut donc bin surpris d’vire personne. Y avot déjà peur d’s’ête trompé d’planète, quand un anneau couleur d’ leune armua dins l’sape.
-       Bonne nuit, fit ch’tchiot prince à tout hasard.
-       Bonne nuit, fit ch’serpent.
-       Sur quelle planète j’sus quéhu ? deminda ch’tchiot prince.
-       Sur l’Tierre, in Afrique, répondit ch’serpent.
-       Ah !..Y a donc personne sur l’Tierre ?
-       Ichi ch’est l’désert. Y a personne dins ches déserts. L’Tierre est grinde, dit ch’serpent.
Ch’tchiot prince s’assit sur eune pierre et leva les yux vers l’ciel :
-       Je m’deminde, dit-il, si ches étoiles sont éclairées afin qu’chacun i peuche un jour artrouver l’sienne. Ravisse m’planète. Alle est juste au d’zeur d’nous… Mais comme alle est loin !
-       Alle est bielle, dit ch’serpent. Quo qu’ch’est qu’te vins faire ichi ?
-       J’ai des difficultés avec eune fleur, dit ch’tchiot prince.
-       Ah !.. fit ch’serpent.
Et is s’turent
-       Du qui sont ches hommes ? arprit ch’tchiot prince. In est un peu seul dins ch’désert.
-       In est seul aussi chez les hommes, dit ch’serpent.
Ch’tchiot prince l’ravisa longtimps :

                                                                                                                    

-       T’es eune drôle d’biête, li dit-il enfin, maigue comme in dogt…
-       Mais j’sus pus puissant que l’dogt d’un ro, dit ch’serpent.
Ch’tchiot prince eut un sourire :
-       T’es pas bin puissant…T’as même pas d’pattes… Te peux même pas voyager…
-       J’peux t’importer pus long qu’un navire, dit ch’serpent.
I s’inroula autour de l’chevile de ch’tchiot prince, comme un bracelet d’or :
-       Ch’ti que j’touche, je l’rinds à l’tierre d’dù qu’i est sorti, dit-il incore.
Mais t’es pur et te viens d’eune étoile…
            Ch’tchiot prince répondit rin.
-       Te m’fais pitié, ti si faipe, sur chette Tierre d’granit. J’peux t’aider un jour si t’argrettes trop t’planète. J’peux…
-       Oh ! J’ai très bin compris, fit ch’tchiot prince, mais pourquo qu’te parles toudis par énigmes ?
-       J’ les résouds tertoutes, dit ch’serpent.
Et y s’turent.

                                                                                retour sommaire      suivant