LE PETIT PRINCE
                     LE CHAPITRE 27

            Et à ch’t’heure, bin sûr, cha fait six ans déjà…j’ai jamais incore raconté ch’t’histoire. Les camarates qui m’ont arvu ont été bin contints d’m’arvir vivant. J’étos trisse mais j’leur disos : Ch’est l’fatigue…
            A ch’t’heure j’me sus un peu consolé. Ch’est à dire…pas tout à fait. Mais j’sais bin qu’i est arvenu  à s’planète, car, au lever de ch’jour, j’ai pas artrové sin corps. Cha n’étot pas un corps tellemint lourd…Et j’ai quer par nuit acouter ches étoiles. Ch’est comme chinq cent millons d’guerlots…
            Mais vla qu’i s’passe quet’cosse d’extraordinaire. L’muselière qu’j’ai dessinée pour ch’tchiot prince, j’ai oublié d’y ajouter eune courroie in cuir ! I ara jamais pu l’attacher à ch’mouton. Alors je m’deminde : « quo qu’ch’est qui s’est passé sur s’planète? Peut-ête bin que ch’mouton a mingé l’fleur… »
            Tantôt je m’dis : «  Sûremint non ! Ch’tchiot prince inframe s’fleur toutes les nuits sous sin glope d’verre, et  surque bin sin mouton… » Alors j’sus bénache. Et toutes ches étoiles ritent duchemint.
            Tantôt je m’dis : «  In est distrait eune fos ou l’aute, et cha suffit ! I a oblié, un soir, ch’glope d’verre, o bin ch’mouton est sorti sins bruit par nuit… » Alors ches guerlots is s’canch’tent tertous in larmes !...
            Ch’est là un bin grind mystère. Pour vous qui avez quer aussi ch’tchiot prince, comme pour mi, rin d’l’univers est semblape si quet’part, in n’sait dù, un mouton qu’in connot pas a, ouais ou non, mingé eune rosse…
            Ravisez ch’ciel. Demindez-vous : ch’mouton ouais ou non a-ti mingé l’fleur ? Et vous verrez comme tout canche…
            Et aucune grinde personne comprindra jamais que cha a tellemint d’importance !

                                                                                       
                                
            Cha ch’est pour mi, l’pus biau et l’pus trisse paysache du monte. Ch’est l’même paysache que ch’ti de l’pache précédente, mais j’lai dessiné eune fos incore pour bin vous l’moutrer. Ch’est ichi que ch’tchiot prince i a apparu sur Tierre, pis disparu.

            Ravisez attintivemint ch’paysache afin d’ête sûrs d’l’arconnaîte, si vous voyagez un jour in Afrique, dins ch’désert. Et, si i vous arrife d’passer par là, j’vous in supplie, n’vous pressez pas, attindez un peu juste d’zous ch’l’étoile ! Si alors un infant vient à vous, si i rit, si i a des caveux d’or, si  répond pas quand in l’interroche, vous devinerez bin qui qu’ch’est. Alors seuchez gintils ! Ne m’laichez pas tellemint trisse : écrivez-me vite qu’i est arvenu…

                                                                                                         FIN
                                                        retour sommaire