LE PETIT PRINCE  d' Antoine St Exupéry

              Traduit en Chti par Cartouche

" à Léon Werth, J’deminde pardon à z’infants d’avoir dédié ch’life à eune grinde personne.J’ai eune escusse sérieusse : Ch’te grinde personne ch’est l’meilleux ami qu’jai eu au monte. J’ai eune aute escusse : ch’te grinde personne peut tout comprinde, même les lifes pour infants. j’ai eune trosième escusse : ch’te grinde personne habite in France dù qu’alle a faim et frod. Alle a bin besoin d’ête consolée. Si toutes ches escusses suffis'tent pas,  j’veux bin dédier ch’liffe à l’infant qu’à été dins l’temps ch’te grinde personne. Toutes ches grindes personnes ont d’abord été des infants (mais y n’a pas gramint qui s’in souviente) J’corrige donc m’dédicace : A Léon Werth, quand i étot tchiot garchon "

Chapitre 1

Quand j’avos six ans j’ai vu, eune fos, eune magnifique imache, dins un life sur l’forêt vierche qui s’appelot « histoires vécues ». ch' arprésintot un serpent boa qui avalot un faufe. Vla l’copie de ch’dessin.

In disot dins ch’life : ches serpents boas avaltent leu proie toute intière, sans l’maquer. Insuite is peutent pus bouger et is dortent pindant  les six mos d’leur digestion. J’ai alors gramint busier sur ches avintures de l’jungle et, à min tour, j’ai réussi, avec un crayon d’couleur, à tracer min premier dessin. Min premier numéro 1. I étot comme cha:

J’ai moutré min chef d’oeuffe à ches grindes personnes et j’leur ai demindé si min dessin i leur faisot peur. Alles ont répondu : pourquo qu’un capiau i ferot peur ?  Min dessin n’arprésentot pas un capiau. I arprésentot un boa qui digérot un éléphant. J’ai alors dessiné l’intérieur de ch’serpent boa, afin qu’ches grindes personnes peuchtent comprinde. Alles ont toudis besoin d’explications. Min dessin numéro 2 étot comme cha :

                Ches grindes personnes m’ont conseillé d’laicher d’côté les dessins d’serpents boas euverts ou framés, et d’m’intéresser putôt à l’géographie, à l’histoire, au calcul et à l’grammaire. Ch’est ainsi qu’j’ai abandonné, à l’ache d’six ans, eune magnifique carrière d’peinte. J’avos été découragé par l’insuccès d’min dessin numéro 1 et d’min dessin numéro 2.
Ches grindes personnes is n’comprintent jamais rin toutes seules, et ch’est usant, pour les infants, d’toudis leur donner des explications.
J’ai donc du cogir un aute ouvrache et j’ai appris à piloter d'z' avions. J’ai volé un tchiot peu partout dins l’monde. Et l’géographie, ch’est exact, m’a gramint servi. J’savos arconnaite de ch’ premier cop d’oeul, l’Chine d’ l’Arizonza. Ch’est très utile, si in est égaré par nuit. J’ai ainsi eu, au cours de m’vie, des tas d’contacts avec des tas d’gins sérieux. J’ai gramint vécu amon des grindes personnes. J’les ai vues d’très près. 
Cha n’a pas trop amélioré m’n’opinion.
Quand  j’in rincontros eune qui m’paraichot un peu lucite, j’faisot l’expérience sur elle d’min dessin numéro 1 que j’ai toudis conservé. 
J’voulos savoir si alle étot vraimint compréhinsife. Mais toudis alle me répondot :
Ch’t’in capiau. Alors j’n’y parlos ni d’serpents boas, ni d’forêts vierches, ni d’étoiles. Je m’mettos à s’portée. J’y parlos d’bridge, d’golf, d’politique et d’cravates. Et l’grinde personne étot bin bénache d’connaite un homme aussi raisonape.