LE PETIT PRINCE 

                                                CHAPITRE 2

J’ai ainsi vécu seu, sans personne avec qui parler  véritablemint, Jusqu’à eune panne dins l’désert du Sahara, y a six ans. Eune séquo s’étot cassé dins ch’moteur.
Et comme j’n’avos avec mi ni mécanicien, ni passagers, je m’préparos à essayer d’réussir, tout seu, eune réparation difficile. Ch’étot pour mi eune question d’vie ou d’mort. J’avos à peine d’ieau à boire pour huit jours. 
L' premier soir je m’sus donc indormi sus l’sape a mille milles d’toute tierre habitée. J’étos bin pus isolé qu’un naufragé sus un radeau au mitan d’l’océan. 
Alors vous imaginez m’surprisse, au lever de ch’jour, quand eune drôle d’vox m’a revellé. Alle disot  : s’il vous plaît…dessine-me un mouton !
Hein ! 
Dessine-me un mouton… 
J’ai sauté sus mes pids comme si j’avos été frappé par l' foude. J’ai bin frotté mes yux. J’ai bin ravisé. Et j’ai vu un tchiot bonhomme tout à fait extraordinaire qui m’considérot grav’mint. 
Vla l' meilleux portrait que, pus tard, j’ai réussi à faire d’li:

Mais min dessin, bin sûr, est gramint moins ravissant que ch’modèle. Ch’est pas de m’faute. J’avos été découragé dins m’carrière d’peinte par ches grindes personnes, à l’ache d’six ans, et j’n’avos rin appris à dessiner, sauf les boas framés et les boas ouverts.
J’ravisos donc ch’t’apparition avec des yux tous ronds d’étonnemint. N’oubliez pas que je m’trouvos à mille milles d’toute régions habitées. Quand j’réussis enfin à parler,j’y’dis : 
         -  Mais quo qu’te fais là ? 
 Et i m’répéta alors, tout duchemint, comme eune séquo très sérieusse : 
         - S’il vous plaît… dessine-me un mouton… 
Quand ch’mystère est trop impressionnant, in ose pas désobéir. 
Aussi apsurte que cha sanne à mille milles d’tous les indrots habités et In danger d’mort, j’sortis de m’poque eune feulle d’papier et un stylographe. 
Mais je m’rappelos alors que j’avos surtout étudié l’géographie, l’histoire, l’calcul et l’grammaire et j’dis à ch’tchiot bonhomme(avec un peu d’mauvaisse humeur) que je n’savos pas dessiner. I m’répondit : 
            - Cha n’fait rin. Dessine-me un mouton. 
Comme j’n’avos jamais dessiné d’ mouton j’arfis, pour li, l’un des deux seuls dessins dont j’étos capape. Ch’ti du boa framé. Et j’fus stupéfait d’intinde ch’tchiot bonhomme m’réponde 
          -  Non ! non !je n’veux pas d’un éléphant ch’est très incombrant. 
Chez mi ch’est tout tchiot. J’ai besoin d’un mouton. Dessine-me un mouton 
Alors j’ai dessiné :

I ravisa attintivemint, pis : 
          -  Non ! ch’ti là i est déjà très malate. Fais-in un aute. 
Je dessinos :

Min ami sourit gintimint, avec indulgence :
            - Te vos bin….ch’est pas un mouton, ch’est un bélier. Y a des cornes… 
J’arfis donc incore min dessin :

Mais i fut arfusé, comme  ches précédents :
        -  Ch’ti là est trop viux. J’veux un mouton qui vife longtimps. 
Alors faute d’patience, comme j’avos hâte d’commincher l’démontache d’min moteur,j’griffonnos ch’dessin chi :

Et j’lanços :     
      -  Cha ch’est l’caisse. Ch’mouton qu’te veux i est d’dins. Mais, j’fus bin surpris d’vire s’illuminer l’visache, d’min jone juche :
           -  Ch’est tout à fait comme cha que j’le voulos ! Te cros qui faut gramint d’hierpe à ch’mouton ?
           -  Pourquo ?
           -  Pasque chez mi ch’est tout tchiot…
           -  Cha suffira sûremint. J’t’ai donné un tout tchiot mouton.
I pincha s’tiête vers ch’dessin :
           -  Pas si tchiot qu’cha…Tiens ! i s’est indormi…
Et ch’est ainsi que j’fis l’connaissance de ch’tchiot prince.

                                                                                                  retour sommaire           suivant