LE PETIT PRINCE
CHAPITRE 10
I
s’trouvot dins l’région des astéroïtes
325,326,327,328,329 et 330. i commincha donc par les visiter pour y
cacher eune occupation et pous s’instruire.
L’première étot habitée par un ro,
l’ro siégeot, harnéqué d’ pourpre et
d’hermine, sur un trône très simpe et cepindant
majestueux.
- Ah ! V’la un sujet,
s’écria ch’ro quand i aperchut ch’tchiot
prince.
Et ch’tchiot prince s’deminda :
- Commint i peut m’connaite pisqu’i m’a incore jamais vu !
I savot pas que, pour les ros, l’monte est très simplifié. Tous ches hommes sont ses sujets.
- Approche te que j’te vos
miux, li dit ch’ro qui étot tout fier d’ête ro
pour quèqu’un.
Ch’tchiot prince cacha des yux,dù s’assir, mais
l’planète étot toute incombrée par
ch’magnifique mintieau d’hermine. I resta donc
d’bout, et, comme i étot mate, i bâilla.
- I est contraire à
ch’létiquette d’ bâiller in présence de
ch’ro, li dit ch’monarque. J’te l’interdis.
- j’peux pas
m’n’impêcher, répondit ch’tchiot prince
tout confus. J’ai fait un long voyache et j’ai pas
dormi…
- alors, li dit ch’ro,
j’t’ordonne d’bâiller.j’n’ai vu
personne bâiller d’puis des années. Ches
bâillemints sont pour mi des curiosités. Allons !
bâille incore. ch’t’un orde.
- Cha
m’intimite…J’peux pus… fit ch’tchiot
prince tout péteux.
- Hum ! Hum ! répondit
ch’ro. Alors j’….j’t’ordonne un cop
d’ bâiller,un cop d’….
I berdouillot un peu et paraichot vexé.
Car
ch’ro tenot essentiellemint à c’que
s’n’autotité seuche respectée. I
n’tolérot pas l’désobéissance.
Ch’étot un monarque absolu. Mais comme i étot
très bon, i donnot des ordes raisonnapes.
« Si j’ordonneros, disot-il courammint, si
j’ordonneros à un général de s’canger
in osiau d’mer, et si ch’général
n’obéichot pas, cha serot pas l’faute de
ch’général. Cha serot de m’faute. »
- J’peux m’assir ? s’enquit timidemint ch’tchiot prince.
- J’t’ordonne d’
t’assir, li répondit ch’ro, qui ramena
majestueusemint un pan d’sin minteau d’hermine
Mais ch’tchiot prince s’étonnot.
L’planète étot minuscule. Sur quo ch’ro
pouvot bin régner ?
- Sire, li dit-il…J’vous deminde pardon d’vous interroger…
- J’t’ordonne d’m’interroger, se hâta d’dire ch’ro
- Sire … sur quo qu’ch’est qu’vous régner ?
- Sur tout, répondit ch’ro, avec eune grinde simplicité.
- Sur tout ?
Ch’ro d’un geste discret désigna
l’planète, l’z’autes planètes et ches
étoiles.
- Sur tout cha ? dit ch’tchiot prince
- Sur tout cha… répondit ch’ro.
Car non seuleumint ch’étot un monarque absolu mais ch’étot un monarque universel.
- Et ches étoiles vous obéitent ?
- Bin sûr, li dit
ch’ro. Alles obéitent aussitôt. Je
n’tolère pas l’indiscipline.
Un
tel pouvoir émerveilla ch’tchiot prince. Si i l’avot
détenu li-même, i arot pu assister, non pas à
quarante-quate, mais à soixante-dousse, ou même à
chint, ou même à deux chint couquers d’solel dins
l’même journée, sans avoir à saquer
s’cayelle !
Et comme i s’sintot un peu trisse à causse de
ch’souvenir de s’tchiote planète abindonnée,
i s’inhardit à solliciter eune grâce à
ch’ro :
- J’voudros vir un couquer
d’solel… Faites-me plaisi…Ordonnez à
ch’solel de s’couquer…
- Si j’ordonneros à un
géneral d’voler d’eune fleur à l’aute
à l’façon d’un papillon, ou
d’écrire eune tragédie, ou de s’canger in
osiau d’mer, et si ch’général
n’exécutot pas l’orde archu, qui, d’li ou
d’mi, serot in tort ?
- Cha serot vous, dit fermemint ch’tchiot prince.
- Exact. I faut exiger
d’chacun cha que chacun peut donner, arprit ch’ro.
l’autorité arposse d’abord sur l’raison. Si
t’ordonnes à tin peupe d’aller s’jeter
à l’mer, i fera eune révolution. J’ai
l’drot d’exiger l’obéissance pasque mes ordes
sont raisonnapes.
- Alors min couquer d’solel ?
rappela ch’tchiot prince qui jamais n’oubliot eune question
eune fos qu’i l’avot posée.
- Tin couquer d’solel, te
l’aras. J’l’exigerai. Mais j’attindrai, dins
m’science de ch’gouvernemint, qu’ ches conditions
seuch’tent favorapes.
- Quand qu’cha sera-t-i ? s’informa ch’tchiot prince.
- Hem ! Hem ! li répondit ch’ro, qui consulta d’abord un gros calindrier,
hem ! hem ! cha sera, vers…vers… cha sera c’soir
vers sept heures quarante ! Et te verras comme j’sus bin
obéi.
Ch’tchiot prince bâilla. I argrettot sin couquer
d’solel manqué. Et pis, i s’innuyot
déjà un peu :
- J’ai pus rin à faire
ichi, dit-il à ch’ro. J’vas arpartir !
- N’pars pas, répondit
ch’ro qui étot si fier d’avoir un sujet.
N’pars pas,j’te fais ministe !
- Ministe d’quo ?
- De…de l’justice !
- Mais y a mi personne à juger !
- In n’sait pas, li dit
ch’ro. J’ai pas core fait l’tour d’min royaume.
J’sus très viux, j’ai pas d’plache pour min
carosse, et cha m’fatigue d’marcher.
- Oh ! mais j’ai
déjà vu, dit ch’tchiot prince qui s’pincha
pour jech'ter incore un cop d’oeul sur l’aute
côté de l’planète. Y a personne là-bas
non pus…
- Te t’jugeras donc
ti-même, li répondit ch’ro. Ch’est l’pus
difficile. Ch’est bin pus difficile de s’juger
li-même que d’juger autrui. Si te réussis à
bin t’juger, ch’est que t’es un véritape sache.
- Mi, dit ch’tchiot prince,
j’peux m’juger mi-même n’importe dù.
J’ai pas besoin d’habiter ichi.
- Hem ! Hem ! dit ch’ro,
j’cros bin que sur m’planète y a
quèqu’part un viux rat.Te l’condamnera à mort
d’temps in temps. Ainsin s’vie alle dépindra de
t’justice. Mais te l’grâcieras chaque fos pour
économiser. Y n’a foqu’un.
- Mi, répondit
ch’tchiot prince, j’ai pas quer condamner à mort, et
j’cros bin que j’m’in vas.
- Non, dit ch’ro.
Mais ch’tchiot prince, ayant achevé ses préparatifs, n’voulut point peiner ch’viux monarque :
- Si vote majesté
désirot ête obéi ponctuellemint, alle pourrot
m’donner un orde raisonnape. alle pourrot m’ordonner, par
exempe, d’partir avant eune minute. I m’sanne que ches
conditions sont favorapes…
Ch’ro n’ayant rin répondu, ch’tchiot prince
hésita d’abord, pis, avec un soupir,pris
ch’départ.
- j’te fais
m’n’ambassadeur, se hâta alors d’crier
ch’ro.
I avot un grind air d’autorité.
Ches grindes personnes sont bin étranches, s’dit
ch’tchiot prince, in li-même, durant sin voyache.
retour sommaire suivant 