LE PETIT PRINCE

                                   CHAPITRE 13

            L’ planète suivante étot chelle de ch’businessman. Ch’t’homme i étot si occupé qui léva même pas s’tiête à l’arrivée de ch’tchiot prince.  
   
                                                                                           


                          
-       Bonjour, li dit ch’ti chi. Vot’cigarette est éteinte.
-       Tros et deux font chinq. Chinq et sept dousse. Dousse et tros quinsse. Bonjour. Quinsse et sept vingt-deux. Vingt-deux et six vingt-huit. Pas l’timps de l’ralleumer. Vingt-six et chinq trente et un. Ouf ! Cha fait donc chinq cent un millons six cent vingt-deux-mille sept cent trente et un.
-       Chinq cent millons d’quo ?
-       Hein ? t’es toudis là ? Chinq cent un millons de…de je n’sais mi pus… J’ai tellemint d’ouvrache ! J’sus sérieux, mi, j’m’amusse pas à des cacoules ! Deux et chinq sept…
-       Chinq cent millons d’quo ? répéta ch’tchiot prince qui jamais de s’vie n’avot arnonché à eune question, eune fos qu’il l’avot posée.
            Ch’businessman  leva s’tiête :
-       Depuis chinquante-quatre ans qu’j’habite ch’te planète-chi, j’ai été déringé que tros fos. L’première fos ch’a été, y a vingt.deux ans, par un hanneton qui étot quéhu dieu sait d’du. I répindot un raffut épouvintape, et j’ai fait quate erreurs dins eune addition. L’seconde fos ch’a été, y a onze ans, par eune crisse d’ rhumatisse. J’minque d’exercice. J’ai pas l’timps d’flâner. j’sus sérieux mi. L’troisième fos… l’vla chi ! J’disos donc chinq cent un millons…
-       Millons d’quo ?
Ch’businessman comprit qu’i étot pas d’espoir d’paix :
-       Millons d’chés tchiotes cosses qu’in vot quequ’fos dins ch’ciel.
-       Des mouques ?
-       Mais non, des tchiotes cosses qui brill’tent.
-       D’z’abelles ?
-       Mais non, Des tchiotes cosses dorées qui font rêvasser ches fates. Mais j’sus sérieux, mi ! J’ai pas l’timps d’rêvasser.
-       Ah ! des étoiles ?
-       Ch’est bin cha. D’z’étoiles.
-       Et quo qu’ch'est qu’te fait d’chinq cent millons d’étoiles ?
-       Chinq cent un millons six cent vingt-deux mille sept cent trente et eune. J’sus sérieux, mi, j’sus précis.
-       Et quo qu’ch’est qu’t’in fait d’ches étoiles ?
-       Cha qu’j’in fait ?
-       Ouais.
-       Rin. j’les possède.
-       Te possèdes ches étoiles ?
-       Ouais.
-       Mais j’ai déjà vu un ro qui…
-       Ches ros is possèd’tent pas. Is regn’tent sur. Ch’est très différent.
-       Et à quo qu’cha t’sert d’posséder ches étoiles ?
-       Cha m’sert à ête riche.
-       Et à quo qu’cha t’sert d’ête riche ?
-       A acater d’autes étoiles, si quequ’un i in troufe.
Ch’ti là, s’dit in li-même ch’tchiot prince, i raisonne un peu comme un ivrone.
Cepindant i posa incore des questions :
-       Commint in peut posséder d’z’étoiles ?
-       A qui qu’alles sont ? riposta, grincheux , ch’businessman.
-       J’sais pas. A personne.
-       Alors alles sont à mi, car j’y ai pinsé l’premier.
-       Cha suffit ?
-       Bin sûr. Quand te treuffes un diamant qui est à personnes, i’est à ti.
Quand te trouffes eune île qui est à personne, alle est à ti. Quand t’as eune idée l’premier, te l’fais breveter : alle est à ti. Et mi j’possède ches étoiles, puisque jamais personne avant mi a songé à les possèder.
-       Cha ch’est vrai, dit ch’tchiot prince. Et quo qu’t’in fait ?
-       J’les gère. J’les compte et les arcompte, dit ch’businessman. Ch’est difficile. Mais j’sus un homme sérieux !
            Ch’tchiot prince n’étot pas satisfait incore.
-       Mi j’posséde un foulard, j’peux l’mette autour d’min co et l’importer.
Mi, si j’possède eune fleur, j’peux cueillir m’fleur et l’importer. Mais te peux pas cueillir d’z’étoiles !
-       Non, mais j’peux les  placher in banque.
-       Quo qu’ch’est qu’cha veut dire ?
-       Cha veut dire que j’écris sur un tchiot papier l’nombe d’mes étoiles. Et pis j’inframe à clef ch’papier là dins un tiroir.
-       Et ch’est tout ?
-       Cha suffit !
Ch’est amusant, pinsa ch’tchiot prince. Ch’est assez poétique. Mais ch’est pas très sérieux.
Ch’tchiot prince avot sur les cosse sérieusses d’z’idées très différentes d’ches idées d’ches grindes personnes.
-       Mi ? dit-i incore, j’possède eune fleure que j’arrosse tous les jours.
J’possède tros volcans que j’ramone toutes les semaines. Car j’ramone aussi ch’ti qui est éteint. In n’sait jamais. Ch’est utile à mes volcans, et ch’est utile à m’fleur, que j’les possède. Mais ti t’es pas utile à ches étoiles…
            Ch’businessman ouvrit s’bouque mais trouva pas à réponde, et ch’tchiot prince s’in fut.
            Ches grindes personnes sont décidémint tout à fait extraordinaires, s’disot-i simplemint in li-même durant l’voyache.
                                                                        retour sommaire      suivant