LE PETIT PRINCE
                      CHAPITRE 14

            L’chinquième planète étot très curieusse. Ch’étot l’pus tchiote d’toutes. Y avot là juste assez d’plache pour loger un réverbère et un allumeux d’réverbères.
Ch’tchiot prince parvenot pas à s’expliquer à quo pouvotent servir, quequ’part dins ch’ciel, sur eune planète sans mason et sans population, un réverbère et un allumeux d’réverbères.

                                                                                                                                                          

Cepindant i s’dit in li-même :

-       Peut-ête bin que ch’t’homme est absurte. Cepindant i est moins absurte que ch’ro, que ch’vaniteux, que ch’businessman et que ch’buveux. Au moins s’n’ouvrache a-t-il un sens.
Quand i alleume sin réverbère, ch’est comme si i faisot naîte eune étoile d’pus, ou eune fleur. Quand i éteint sin réverbère cha indort l’fleur ou ch’l’étoile. Ch’est eune occupation très jolie.
Ch’est véritablemint utile puisque ch’est joli.
            Lorsqu’i aborda l’planète i salua respectueusemint ch’l’allumeux :

-       Bonjour. Pourquo qu’te viens d’éteinde tin réverbère ?
-       Ch’est l’consine, répondit ch’l’allumeux. Bonjour.
-       Quo qu’ch’est l’consine ?
-       Ch’est d’éteinde min réverbère. Bonsoir.
et il l’ralleuma.

-       Mais pourquo qu’te viens de l’ralleumer ?
-       Ch’est l’consine, répondit ch’l’allumeux.
-       J’comprinds pas, dit ch’tchiot prince.
-       Y a rin à comprinde, dit ch’l’allumeux. L’consine ch’est l’consine. Bonjour.
Et i éteindit sin réverbère.
Pis i s’épongeat sin front avec un mouquoir à carreaux rouches.

-       J’fais là un métier terripe. Ch’étot raisonape autefos. J’éteignos l’matin et j’alleumos l’soir. J’avos l’reste du jour pour m’arposer, et l’reste de l’nuit pour dormir…

            Et depuis ch’t’époque, l’consine alle a cangé ?

-       L’consine alle a pas cangé, dit ch’l’allumeux. Ch’est bin là l’drame ! l’planète d’année in année a tourné d’pus in pus vite, et l’consine alle a pas cangé !
-       Alors ? dit ch’tchiot prince.
-       Alors à ch’t’heure qu’alle fait un tour par minute, j’ai pus eune seconde d’arpos. J’alleume et j’éteins eune fos par minute.
-       Cha ch’est drôle ! Ches jours chez ti dur’tent eune minute !
-       Cha n’est pas drôle du tout, dit ch’l’allumeux. Cha fait déjà un mos qu’in parle insanne.
-       Un mos ?
-       Ouais. Trente minutes. Trente jours ! Bonsoir.

Et i ralleuma sin réverbère
Ch’tchiot prince i l’ravisa et i a eu quer ch’l’allumeux qui étot tellemint fidèle à l’consine. Y s’souvint d’ches couquers d’solel que li-même allot autefos cacher, in saquant s’cayelle.
 I voulut aider s’n’ami :

-       Te sais… J’connos un moyen d’t’arposer quand te voudras…
-       J’veux toudis, dit ch’l’allumeux.

Car in peut ête, à l’fos, fidèle et fate.
Ch’tchiot prince pousuivit :

-       T’planète est tellemint tchiote que t’in fait l’tour in tros injimbées. T’as qu’à marcher assez lentemint pour rester toudis au solel. Quand te voudras t’arposer te marcheras… et l’jour durera aussi longtimps qu’te voudras.

-       Cha m’avanche pas à grand’cosse, dit ch’l’allumeux. Cha qu’j’ai quer dins la vie ch’est dormir.
-       Ch’est pas d’chance, dit ch’tchiot prince.
-       Ch’est pas d’chance, dit ch’l’allumeux. Bonjour.

Et i éteignit sin réverbère.
Ch’ti là, s’dit ch’tchiot prince, tandis qu’i poursuivot pus long sin voyache, ch’ti là serot méprisé par tous z’autes, par ch’ro, par ch’vaniteux, parch’buveux, par ch’businessman.
Cepindant, ch’est l’seul qui paraiche pas ridicule. Ch’est, peut-ête, pasqu’i s’occupe d’aute cosse que d’li-même.

            I eut un soupir d’argret et s’dit incore :

-       Ch’ti là est l’seul dont j’aurot pu faire min ami. Mais s’planète est vraimint trop tchiote. I a pas d’plache pour deux…

            Cha que ch’tchiot prince n’osot pas s’avouer, ch’est qu’i argrettot ch’te planète bénite à cosse, surtout, des mille quate cent quarante couquers d’solel par vingt-quatre heures !
                                                                                    

                                                                          retour sommaire     suivant