LE PETIT PRINCE       
               CHAPITRE 15

            L’sixième planète étot eune planète dix fos plus vaste. Alle étot habitée par un viux Monsieur qui écrivot d’énormes lifes.

                                                               
                                                                 
         -       Tiens ! vla un explorateur ! s’écria-t-i, quand i aperchut ch’tchiot prince
Ch’tchiot prince s’assit sur l’tape et souffla un peu. I avot déjà tant voyagé    
         -       d’dù qu’te viens ? li dit ch’viux Monsieur.
           -    quo qu'ch'est que ch'gros life ? dit ch'tchiot prince.Quo qu' vous faites ichi ?
           -       J’sus géographe, dit ch’viux Monsieur.
           -       Quo qu’ch’est un géographe ?
           -       Ch’t’un savant qui connot du qu’is s’trouv’tent ches mers, ches fleufes, ches villes, ches montanes et ches déserts.
           -       Cha ch’est bin intéressant, dit ch’tchiot prince. Cha ch’est enfin un véritape métier ! Et i jeta un cop d’oeul autour d’li sur l’planète de ch’géographe. I n’avot jamais vu incore eune planète aussi majestueusse.
           -       Alle est fin belle, vote planète. Est-ce qu’y a d’z’ océans ?
           -       Je n’peux mi l’savoir, dit ch’géographe.
           -       Ah ! (Ch’tchiot prince étot déçu) Et des montanes ?
           -       Je n’peux mi l’savoir, dit ch’géographe.
           -       Et des villes et des fleufes et des déserts ?
           -       Je n’peux mi l’savoir non pus, dit ch’géographe.
           -       Mais vous êtes géographe !
           -       Ch’est exact, dit ch’géographe, mais j’sus pas explorateur. J’minque absolumint d’explorateurs. Cha n’est pas ch’géographe qui va faire l’compte d’ches villes, d’ches fleufes, d’ches montanes, d’ches mers, d’ches océans et d’ches déserts.
L’géographe i est trop important pour li flâner. I quitte pas sin bureau. Mais i archeut ches explorateurs. I les interroche, et i prind in note leux souvenirs.
Et si ches souvenirs d’l’un d’intre eux li paraich’tent intéressants, ch’géographe fait faire eune enquête d’moralité de ch’l’explorateur.
           -       pourquo cha ?
           -       Pasqu un explorateur qui mintirot intraînerot des catastrophes dins ches lifes d’géographie. Et aussi un explorateur qui buvrot d’trop.
           -       pourquo cha ?
           -       Pasque ches ivrones is votent doupe. Alors ch’géographe i noterot deux montanes, là dù qui n’a qu’eune.
           -       J’connos quelqu’un, dit ch’tchiot prince, qui serot mauvais explorateur.
           -       Ch’est possipe. Donc, quand l’moralité de ch’l’explorateur paraît bonne, in fait eune enquête sur s’découverte.
           -       In va vir ?
           -       Non . Ch’est trop compliqué. Mais in exiche de ch’l’explorateur qu’i fournisse des preufes. Si i s’agit par exempe de l’découverte d’eune grosse montane, in exiche qu’y ramène des grosses pierres
Ch’géographe soudain s’émut.
            -       Mais ti, te viens d’long ! T’es un explorateur ! Te vas m’décrire t’planète !
            Et ch’géographe ayant ouvert sin registe, tailla sin crayon. In note d’abord au crayon ches récits  d’ches explorateurs. In attind, pour noter à l’incre, que ch’l’explorateur euche fourni des preufes.
            -       Alors ? interrogea ch’géographe.
            -       Oh ! chez mi, dit ch’tchiot prince, cha n’est pas intéressant, ch’est tout tchiot. J’ai tros volcans. Deux volcans in activité, et un volcan éteint. Mais in n’sait jamais.
            -       In n’sait jamais, dit ch’géographe
         -       J’ai aussi eune fleur.
           -       In note pas ches fleurs, dit ch’géographe.
           -       Pourquo cha ! ch’est l’pus joli !
           -       Pasque ches fleurs sont éphémères.
           -       Quo qu’cha signifie : éphémères ?
           -       Ches géographies, dit ch’géographe, sont ches lifes les pus précieux d’ tous ches lifes. Alles se démotent jamais. I est très rare qu’eune montane cange d’plache. I est très rare qu’un océan s’vide de s’n’iau.
In écrit des cosses éternelles.
            -       Mais ches volcans éteints is peutent s’réveiller, interrompit ch’tchiot prince. Quo qu’cha signifie  éphémère ?
            -       Que ches volcans seuchent éteints ou seuchent réveillés, cha arvient au même pour nous autes, dit ch’géographe. Cha qui compte pour nous ch’est l’montane. Alle cange pas.
            -       Mais quo qu’cha signifie  éphémère ? répéta ch’tchiot prince qui, de s’vie, n’avot jamais arnonché à eune question, eune fos qu’i l’avot posée.
            -       Cha signifie qui est menacé d’disparition prochaine.
            -       M’fleur est menacée d’disparition prochaine ?
            -       Bin sûr.
          -      M’fleur est éphémère, s’dit ch’tchiot prince, et alle a que quate épines pour s’définde contre l’monte ! Et j’l’ai laichée toute seule chez mi !
Cha fut là sin premier mouvemint d’argret. Mais i arprit courache :
            -        Quo qu’vous m’conseillez d’aller visiter ? deminda-t-il.
            -       L’planète Tierre, li répondit ch’géographe. Alle a eune bonne réputation
Et ch’tchiot prince s’in fut, songeant à s’fleur.
                                                                                    retour sommaire                    suivant