LE PETIT PRINCE
                              CHAPITRE 16

            L’septième planète fut donc l’Tierre.

            L’Tierre ch’est pas eune planète quelconque ! In y compte chint onse ros ( in oubliant pas, bin sûr, ches ros nèques), sept mille géographes, neuf chint mille businessmen, sept millons et d’mi d’ivrones, tros chint onse millons d’vaniteux, ch’est à dire inviron deux millards d’grindes personnes.

            Pour vous donner eune idée d’ches diminsions de l’Tierre j’vous diros qu’avant l’invention d’l’électricité in y devot intretenir, sur l’insempe d’ ches six continents, eune véritape armée d’ quate chint sochinte deux mille chinq cent onse allumeux d’réverbères.

            Vu d’un peu long cha faisot un effet splendite. Les mouvemints d’chette armée étotent réglés comme ceux d’un ballet d’opéra. D’abord venot l’tour d’ches allumeux d’réverbères d’ Nouvielle Zélante et d’Australie. Pis ches là ayant alleumé leux lampions, s’in allotent dormir. Alors introtent à leux tour dins l’danse ches allumeux d’réverbères d’Chine et d’Sibérie. Pis eux aussi s’escamototent dins ches coulisses. Alors venot l’tour d’ ches allumeux d’réverbères d’Russie et des Intes. Pis d’cheux d’Afrique et d’Europe. Pis d’cheux d’Amérique du sut’. Pis d’cheux d’Amérique de ch’nord. Et jamais is s’trompotent dins leur orde d’intrée in scène. Ch’étot grandiosse.

            Seuls, ch’l’allumeux de ch’l’unique réverbère de ch’pôle nord, et sin confrère de ch’l’unique réverbère de ch’pôle sut’, menotent des vies d’osiveté et d’nonchalance : Is travaillotent deux fos par an.

                                                retour sommaire        suivant