LE PETIT PRINCE
                                    CHAPITRE 20

            Mais i arriva que ch’tchiot prince, ayant longtimps marché à travers ches sapes, ches rocs et ches neiches, découvrit enfin eune route. Et ches routes vont tertoutes amon d'ches hommes.

-       Bonjour, dit-i.

Ch’étot un gardin fleuri d’ rosses.
-       Bonjour, dir’tent ches rosses.

Ch’tchiot prince les ravisa. Alles arsannotent tertoutes à s’fleur.
                                                                                                       
-       Qui qu’ch’est qu’vous êtes ? leur deminda-t-i stupéfait.
-       In est des rosses, dir’tent ches rosses.
-       Ah ! fit ch’tchiot prince…

Et i s’sintit très malheureux. S’fleur li avot raconté qu’alle étot seu de s’n’espèce dins ch’l’univers. Et vla chi qui n’avot chinq mille, tertoutes semblapes, dins un seul gardin !
            Alle serot bin vexée, s’ dit-i, si alle veyot cha…alle tousserot énormémint et ferot simblant d’mourir pour écapper au ridicule. Et j’seros bin obligé d’ faire simblant de l’sogner, car, sinon, pour m’humilier mi aussi, alle se laicherot vraimint mourir…
            Pis i s’ dit incore : je m’croyos riche d’eune fleur unique, et j’ possède qu’eune rosse ordinaire. Cha et mes tros volcans qui m’arriv’tent au genou, et dont l’un, peut-ête, est éteint pour toudis, cha fait pas d’mi un bin grind prince…Et, couqué dins l’hierpe, i s'est mis a braire.
                                                                                                       

                                                                        retour sommaire      suivant