CHAPITRE 4
J’avos ainsi appris eune seconde séco très importinte : Ch’est que s’planète d’origine étot à peine plus grante qu’eune mason !
cha n’pouvot pas m’étonner gramint. J’savos bin qu’in déhors d’ches grosses planètes comme l’ Tierre, Jupiter, Mars, Vénus, à chelles qu’in a donné des noms, y n’d’a des chintaines d’autes qui sont quéqu’ fos si tchiotes qu’in a gramint d’mau à les vire au téléscope. Quand un astronome découfe l’eune
d’elles, i li donne pour nom un numéro. I l’appelle par exempe : « l’astéroïte 3251 »
J’ai d’sérieusses raisons d’croire que l’planète dù qui venot ch’tchiot Prince ch’est l’astéroïte B 612. Ch’t’astèroïte n’a été aperchu qu’eune fos au Téléscope, in 1909, par un astronome turc.
I avot fait alors eune grante démonstration de s’découverte à un congrès international d’astronomie. Mais personne n’l’avot cru à causse d’sin costume. Ches grindes personnes alles sont comme cha !
Heureusemint pour l’réputation de ch’l’astéroïte B 612 un dictateur turc imposa à sin peupe, sous peine d’mort, d’s’arnaquer à l’Européeunne. Ch’l’astronome arfit s’démonstration in 1920, dins un habit très élégant. Et ch’te fos chi tout l’monte fut de s’n’avis.
Si j’vous raconte ches détals sur ch’l’astéroïte B 612 et si j’vous ai confié ch’numéro, ch’t’à causse d’ches grindes personnes. Ches grindes personnes ont quer ches chiffes.
Quand vous leur parlez d’un nouviau ami, alles n’vous questionn’tent jamais sur ch’l’essentiel. Alles n’vous dis'tent jamais :
« quel est l’son de s’vox ? Quels sont ches jux qui préfère ? Est-ce qui collectionne ches papillons ? »
alles vous demantent : « Que l’ache qui a ? Combin qu’i a d’frères ?Combin qui pèse ? Combin qui gane sin père ? » Alors seulemint alles crotent l’connaite. Si vous dites à ches grindes personnes : « j’ai vu eune belle mason in briques rosses, avec des géraniums à ches ferniêtes et des coulons sur ch’tot… »
Alles parvienn’tent pas à s’imaginer ch’te mason. I faut leur dire : « j’ai vu eune mason d’cint mille francs. » Alors alles s’écrit’ent : « Comme ch’est joli !»
Ainsin, si vous leur dites : « l’preufe que ch’tchiot prince a existé ch’est qu’i étot ravissant, qu’i riot, et qu’i voulot un mouton. Quand in veut un mouton ch’est l’preufe qu’in existe » Alles hausseront leux épaules et vous traiteront d’infant ! Mais si vous leur dites : « l’planète d’dù qui venot ch’est l’astéroïte B 612 » alors alles seront convaincues, et alles vous laicheront tranquille avec leux questions. Alles sont comme cha. I n’faut pas leur in vouloir.Ches infants dotent ête très indulgents invers ches grindes personnes.
Mais, bin sur, nous qui comprindons la vie, in s’moque bin d’ches numéros ! J’aros eu quer commincher ch’t’histoire à l’façon d ches contes d’fées. J’aros eu quer dire :
« I étot eune fos un tchiot prince qui habitot eune planète à peine plus grante qu’li, et qui avot besoin d’un ami… » pour ceux qui comprintent la vie, cha aurot eu l’air gramint plus vrai.
Car j’ai pas quer qu’in lisse min liffe à la légère. J’éproufe tant d’chagrin à raconter ches souvenirs. Y a six ans déjà que min ami s’in est allé avec sin mouton. Si j’essaie ichi de l’décrire, ch’est afin de n’pas l’oublier.
Ch’est trisse d’oublier un ami. Tout l’monte n’a pas eu un ami. Et pis j’pourros devenir comme ches grindes personnes qui n’s’intéress’tent plus qu’à ches chiffes. Ch’est donc pour cha incore que j’ai acaté eune boite d’couleurs et des crayons. Ch’est dur d’s’armette au dessin, à m’n’ache, quand in a jamais fait d’autes tintatifes que chelle d’un boa framé et chelle d’un boa
ouvert, à l’ache d’six ans ! j’essaierai, bin sûr, d’faire des portraits l’plus arsonnants possipe. Mais j’sus pas du tout certain d’ réussir.
Un dessin va, et l’aute n’arsonne plus. Je m’trompe un peu aussi sur l’talle. Ichi ch’tchiot prince est trop grand. Là i est trop tchiot. J’hésite aussi sur l’couleur d’sin costume. Alors j’tatonne comme chi comme cha, tant bin qu’mal. Je m’tromperos enfin sur certains détals plus importants.
Mais cha, y faudrot me l’pardonner. Min ami n’donnot jamais d’explications. I m’croyot peut ête simblape à li. Mais mi, malheureusemint, je n’sais pas vire ches moutons à travers ches caisses.
J’sus peut ête un peu comme ches grindes personnes. J’ai du vieuzir.
retour sommaire suivant 