LE PETIT PRINCE

                                                                 CHAPITRE 5

              Chaque jour j’apprenos eune séco sur l’planète, sur l’départ, sur l’voyache. Cha venot tout duchemint, au hasard des réflexions. Ch’est ainsin que, l’trosième jour, j’connus ch’drame d’ches baobapes.
              L’fos chi incore cha fut grâce à ch’mouton, car brusquemint ch’tchiot prince m’interrogea comme pris d’un doute grafe :
-          Ch’est bin vrai, n’est-ce pas, qu’ches moutons ming’tent ches arbustes ?
-          Ouais ch’est vrai.
-          Ah ! j’sus contint.
Je n’compris pas pourquo i étot si important qu’ches moutons is ming’tent ches arbustes. Mais ch’tchiot prince ajouta :
-          Par conséquent is ming’tent aussi ches baobapes ?
J’fis armarquer à ch’tchiot prince que ches baobapes n’sont pas d’z’arbustes, mais des arpes grinds comme d’z’églisses et que, si même i importot avec li tout un troupiau d’éléphants, ch’troupiau n’viendrot pas à bout d’un seul baobape.
           L’idée de ch’troupiau d’éléphants fit rire ch’tchiot prince :
-          I faudrot les mette les uns sur l’z’ autes…

               
                                                                                       

 Mais i armarqua avec sagesse :
-          Ches baobapes, avant d’grindir, cha comminche par ête tchiot.
-          Ch’est exact ! mais pourquo veux-tu qu’ches moutons ming’tent ches tchiots baobapes ?
-          I m’répondit : « bin ! voyons ! » comme si i s’agissot là d’eune évidence. Et i m’fallut un grind effort d’intelligence pour comprinde à mi seu ch’problème.
           Et in effet, sur l’planète de ch’tchiot prince, i avot comme sur toutes ches planètes, des bonnes hierpes et des mauvaisses graines . Mais ches graines sont invisipes. alles dortent dins l’secret de l’tierre jusqu’à qu’i prenne l’fantaisie à l’eune d’intre elles de s' réveiller. Alors alle s’étire, et pousse d’abord timidemint vers l’solel eune ravissante tchiote brindile inoffinsife. Si i s’agit d’eune brindile d’radis ou d’rosier, in peut l’laicher pousser comme alle veut. Mais si i s’agit d’eune mauvaise plante,i faut arracher l’plante aussitôt, dès qu’in a su l’arconnaite.Or y avot des graines terripes sur l’planète de ch’tchiot prince…ch’étot des graines d’baobapes.
          L’sol de l’planète in étot infesté. Or un baobape, si in s’y prind trop tard, in n’peut jamais pus s’in débarrasser. I incompe tout l’planète. I l’perfore d’ses rachines. Et si l’planète alle est trop tchiote, et si les baobapes sont trop nombreux, is l’ font éclater.                                                    
      

                                                       


 

 

« Ch’est eune question d’discipline, m’disot pus tard ch’tchiot prince. Quand in a terminé s’toilette du matin, i faut faire soigneusemint l’toilette de l’planète. I faut s’astreinte régulièremint à arracher ches baobapes dès qu’in les distingue d’avec ches rosiers auxquels is arsonn’tent gramint quand is sont très jonnes. Ch’est un ouvrache très innuyeux, mais très facile »
          Et un jour, i m’conseilla d’m’appliquer à réussir un biau dessin, pour bin faire rintrer cha dins l’tiête d’z’infants d’ chez mi. « si is voyag’tent un jour, qu'i m’disot, cha pourrot leu servir. I est quequ’fos sans inconvénient d’armette à pus tard s’n’ouvrache. Mais si i s’agit d’ches baobapes, ch’est toudis eune catastrophe. j’ai connu eune planète, habitée par un fate. I avot négligé tros arbustes… »
         Et, sur ches indications de ch’tchiot prince, j’ai dessiné ch’te planète là. j’n’ai pas gramint quer prinde l’ ton d’un moralisse. Mais l’danger d’ches baobapes i est si peu connu, et les risques courus par ch’ti qui s’égarerot dins un astéroïte sont si considérapes, que, pour eune fos, j’fais exception à m’réserfe.
 j’dis : « Infants ! faites attintion à ches baobapes ! »



                                                       

 

 


Ch’est pour avertir m’z’ amis d’un danger qu’is frôlotent d’puis longtimps, comme mi même, sans l’connaite, que j’ai tant ouvrer sur ch’dessin là. L’leçon que j’donnos in valot la peine. vous vous deminderez peut ête :
« Pourquo y a pas, dins ch’liffe, d’aute dessins aussi grindiosses que ch’dessin des baobapes ? l’réponse alle est bin simpe : j’ai essayé mais j’ai pas pu réussir. Quand j’ai dessiné ches baobapes j’ai été animé par l’sintimint d’l’urgence.

                                                        retour sommaire             suivant