LE PETIT PRINCE

                                                 CHAPITRE 9           





                                                        



 
 

 

                J’cros qu’i profita, pour s’n’évasion, d’eune migration d’osiaux sauvaches. Au matin de ch’départ i mit s’planète bin in orde. I ramona soigneusemint ses volcans in activité.
Et ch’étot bin commote pour faire cauffer ch’tchiot déjeuner du matin. I possédot aussi un volcan éteint. Mais, comme i disot : « in sait mi jamais ! » I ramona donc aussi ch’volcan éteint.
                Si is sont bin ramonés, ches volvans brul’tent duchemint et régulièremint,sans éruptions. Ches éruptions volcaniques sont comme des fux d’ quéminée.
                Evidemmint sur not’tierre in est gramint trop tchiots pour ramoner nos volcans. Ch’est pourquo is nous caus’tent tant d’innuis.

 

                                        



 


                   

            Ch’tchiot prince arracha aussi, avec un peu d’mélincolie, ches dernières pousses d’baobapes. I croyot jamais pus devoir arvenir. Mais tous ches ouvraches familiers li parur’tent,
ch’matin là, extrèmemint douches. Et, quand i arrosa eune dernière fos l’fleur, et s’prépara à l’mette à l’abri d'zous sin glope, i s’découvrit l’invie d’braire.
-          Adieu, dit-il à l’fleur.
Mais alle y répondit pas.
-          Adieu, qu'i répéta
L’fleur alle toussa. Mais ch’étot pas à causse d’sin rheume.
-          J’ai été sotte, li dit-elle enfin. J’te deminde pardon. Tâche d’ête bénache.
            I fut surpris par l’absence d’arproches. I restot là tout déconchintré,l’glope in l’air. I comprenot pas ch’te doucheur calme.
-          Mais ouais, j’t’ai quer, li dit l’fleur. Te n’as rin su, par m’faute. Cha n’a aucune importance. Mais t’as été aussi sot qu’mi. Tache d’ête bénache…Laiche ch’glope tranquille. j’in veux pus.
-          Mais ch’vint…
-          j’sus pas si inrheumée qu’cha …l’air fraique de l’nuit m’fera du bin.J’sus eune fleur.
-          Mais ches biêtes…
-          I faut bin que j’supporte deux ou tros cheniles si j’veux connaite ches papillons. I paraît qu’ch’est tellemint biau. Sinon qui ch'est qui m’rindra visite ? Te seras loin, ti. Quand à ches grosses biêtes, j’crains rien. J’ai mes griffes.
            Alle moutrot naïvemint ses quate z’épines. Pis alle ajouta :
-          N’traine pas comme cha, ch’est agaçant. T’as décidé d’partir.va t’in.
            Car alle voulot pas qu’i l’viche braire. Ch’étot eune fleur tellemint orgueilleuse…

                                                                                          retour sommaire            suivant